Gov Ace Barbers giaprubahan ang Php 1 ka milyon nga budget alang sa Internet Access sa napulo ka Public Secondary Schools sa Probinsya

Si Gov. Robert Ace Barbers migahin ug usa ka milyon (Php 1M) nga pondo alang na sa paglusad ug “internet connectivity” sa napulo ka mga public secondary schools dinhi sa probinsya. Inubanan sa hiniusang pakigtambayayungay sa Department of Education ug Ayala Foundation Incorporated, si Gov. Ace Barbers mipirma sa usa ka Memorandum ug Agreement nga ipadayon ang DepEd Internet Connectivity project (DICP) dinhi sa lalawigan sa Surigao del Norte.

Ang maong proyekto nakahatag ug dakong tabang sa pipila ka mga kabatan-onan dinhi sa atong dapit nga walay halos kasayuran sa nagkataas nga panginahanglanon karon sa gitawag nga “advanced information technology”. Tungod niini, si Gov. Ace mihimo ug mga lakang aron nga dili mahikawan ang mga tinun-an nga anaa nagtungha sa mga hilit nga kabarangayan.

Sa maong pagtambayayungay, ang Ayala Foundation Incorporated mohatag sa mga kahimanan sa teknolohiya sama sa computer servers, printers ug local area networking peripherals ug isip kabahinan sa kadumalahan sa probinsya, mohatag sila sa pondo aron sa paghimo sa mga computer laboratories sa matag eskuylahan.

Si Gov Ace Barbers mi aprubar sa paghatag sa maong proyekto sa mga mosunod nga mga tulungha-an dinhi sa probinsya:

1. Alegria National High school
2. Cantapoy National High School
3. Lasicam Perral National High School
4. Lakandula National High School
5. Malimono National High School
6. Mayag national High School
7. Paco National High School
8. Pili National High School
9. Placer National High School
10. Villariza National High School

Gipanghinaut sa batan-ong Gobernador nga ang maong tabang makahatag ug dakong kabag-ohan ug kadasig sa mga tinun-an sa sekondarya nga mas maningkamot ug ila usab nga ampingan ang maong mga kahimanan aron kini mapuslan pa sa mga mosunod nga henerasyon. (PGO-Media Bureau)

Share: