Panggamhanan sa probinsya ubos sa pagpangulo ni Gov. Ace Barbers mihatag na usab ug scholarship grants sa halos 53 ka mga kabatan-onan

Aron sa paghatag katumanan sa mga pangandoy sa mga kabus nga kabatan-onan nga makatungha sa kolehiyo, ang kadumalahan sa probinsya nga gipanguluhan ni Gov. Robert Ace Barbers, mihatag na usab ug laing educational assistance sa may singkwentay-tres (53) ka mga tinun-an sa high school nga mipasar sa standards nga gikinahanglan sa maong programa.

Sa nasayran, aduna nay 152 ka mga scholars ang una ng gihatagan sa maong pribiliheyo, diin kini sila nagpadayon karon sa ilang ikaduha nga tuig sa pagtungha sa kolehiyo ug karon nga tuig, nadungagan na usab kini sa mga bag-ong han-ay sa mga scholars.

Ang maong Scholarship Grant magamit sa pipila ka mga tulungha-an dinhi sa probinsya sama sa Surigao State College of Technology ug sa Surigao del Norte College of Agriculture and Technology.

Ang maong mga scholars makabaton ug ubay-ubay nga mga benipisyo sama sa regular o binulan nga allowance, laing allowance usab para sa ilang mga proyekto sa matag semester, libre nga tuition ug uban pang balayronon sa eskwelahan. Ang mga bag-ong scholars makadawat lamang sa ilang full-scholarship human nga ilang mapasa ang tanang gikinahanglang papeles, intervierw ug kung sila makapasa usab sa entrance examination nga ipahigayon sa nagkadaiyang tulungha-an.

Gilauman ni Gov. Ace Barbers nga ang maong mga scholars magmadasigon sa pagtungha ug ila gayud nga paningkamutan nga matapos nila ang ilang tagsa-tagsa nga mga korso aron nga sila usab mamahimong inspirasyon diha sa uban ug pinaagi niini dako ang ilang mahitampo ug maitabang sa katilingban. (PGO-Media Bureau)

Share: