Programa ni Gov. Barbers sa mga Binilanggo pinakauna sa Nasud

Mapagarbuhon ang mga inmates sa Provincial Jail sa gihatag ni Gov. Ace Barbers nga proyekto diin maoy pinakauna kini sa tibuok nasud matud pa sa Regional Director sa DOST nga si Dir. Lyndo Villacorta.

Atol sa pag-inagurar sa MRF o ang Material Recovery Facility ni Gov. Barbers dili palang dugay sa Provincial Jail, gipahayag sa OIC sa PEMO, Antonieto Charcos nga mas mapuslanon pa ang maong proyekto ug angay nga ipasigarbo kumpara sa “dancing inmates” sa Sugbo nga misikat sa youtube, tungod kay ang atong mga inmates nga gitawag ug mga “ECO BOYS” nagtabang man dili lamang sa ilang mga kaugalingon, kundi pati usab sa tibuok katilingban, nasud ug gani pa sa tibuok kalibutan tungod sa pagsanong niini batok sa Global Warming.

Daghan usab ang nakadayeg sa maong inisyatibo ni Gov. Barbers tungod kay matud pa sa dugang pahayag ni Dir. Villacorta nga mamahimo kini nga modelo sa ubang mga probinsya sa nasud tungod ky pinakauna kini nga programa sa Ecological Solid Waste Management (ESWM) nga nakabase sa mga binilanggo ug nahimo silang produktibo.

Dako gayud ang kalipay sa mga binilanggo tungod kay gipasaligan sila sa maalagarong Gobernador Barbers nga walay problema sa pagbaligya sa tanan nilang abot tungod kay gipangandam na daan kini niya pinaagi sa Provincial Agriculture Office ug uban pang mga pribadong negosyante sa tibuok probinsya. (PGO-Media Bureau)

Post a Comment

Previous Post Next Post