Gov. Ace Barbers Mipahigayon ug pag “turn-over” sa Free Grow Liquid Seaweed Fertilizer sa matag munisipyo

Dako ang kalipay sa tanang mga municipal agriculturist sa gipalapdan karon nga mga programa sa atong maalagarong Gobernador Robert Ace Barbers sa agrikultura diin kini mipahigayon sa pag “turn-over” sa halos 500 ka kahon sa mga organic liquid fertilizers niadtong miaging adlaw, Enero 14, 2009 didto sa Provincial Agriculture Office.

Ang matag munisipyo magpakadawat ug tig 100 ka gallons sa maong organic fertilizer diin si Mr. Trujelio Pepito nga maoy atong OIC Provincial Agriculturist, mapagarbohong mipahibalo sa tanan, nga ang maong fertilizer mga ginganlag “Free Grow Liquid Seaweed Fertilizer” maayo para sa pagpadako ug pagpatambok sa atong mga pananom ug usab kini luwas sa makahilong kemikal ug gani, iyang dugang gibutyag nga kini magamit usab sa mga mananap ug gani sa tawo isip “energy booster”.

Dugang pa niini, malipayon ang PAO nga ang maong organic fertilizer gi “export” na sa halos 15 ka nasud sa tibuok kalibutan.

Ang “Free Grow Liquid Seaweed Fertilizer” usa lamang sa mga ubay-ubay nga programa ni Gob. Ace Barbers ubos sa iyang Fertilizer Support Program para sa pagpahamok pa sa atong mga humay ug mga pananom sa probinsya sa Surigao del Norte.

Nagmabungahon ang maong tigum diin siya mipadayag sa tanang mintambong nga karong umaabot Pebrero 2, 2009, siya mopahigayon ug usa ka consultative meeting sa tanang mga aktibong mag-uuma nga miyembro sa matag rice farmers associations aron usab sila mabati-an ug mahatagan ug igong atensyon ang ilang mga isyu ug mga mulo sa nagkadaiyang munisipyo.

Dako ang pasalamat ni Gob. Ace Barbers sa suporta ug pakig tambayayungay nga gipakita sa matag munisipyo aron lamang makab-ot ang tiunay nga kalambo-an sa agrikultura sa tibuok probinsya nga maoy tumong ug tinguha sa iyang pangagamhanan. (PGO-Media Bureau/PIA-Surigao del Norte)

Share: