Gov. Ace Barbers mohatag na usab ug kahigayunan nga makatrabaho ang mga katawhang Surigaonong walay trabaho

Ang kasamtangang pangagamhanan sa probinsya ubos sa pagdumala ni Gov. Robert Ace Barbers, inabagan sa Public Employment Services Office (PESO) sa probinsya, Department of Labor and Employment (DOLE), POEA ug ang TESDA mohatag na usab ug laing higayon nga makatrabaho ang pipila nato ka mga kaigsuonang Surigaonon nga wala nay trabaho o wala pa makakita ug trabaho.

Sugod karong adlawa, Nobyembre 11, 2009 hangtud ugmang adlawa, ang maong mga buhatan mopahigayon sa ilang Jobs Fair o Jobs Bridging nga pagahimuon didto sa Provincial Convention Center, ning atong dakbayan. Ang maong jobs fair abli sa tanan nga kasamtangang mangitag trabaho, mga fresh graduates o kadtong mga gusto magtrabaho gawas sa nasud.

Sa maong kalihukan, aduna usab Migrant Desk nga ipahimutang alang sa tanang overseas workers nga adunay mga pangutanao mga nagitag katin-awan kalabot sa ilang mga kahimtang didto gawas sa nasud.

Dako ang panghinaut ni Gov. Ace Barbers nga ang maong jobs fair makahatag ug dakong tabang sa tanang naginahanglan niini. Iya usab nga gilauman ug gipanglantawan nga kining mga trabaho makahatag ug higayon aron nga ilang magamit ang ilang mga nakat-onan sa tulungha-an, sa mga pagbansay-bansay nga ilang gisalmutan ug sa mga niaging eksperyensya sa pagpanarbaho aron sila molambo ug aron nga mamahimo silang tinuod nga episyente ug epektibong katawhan sa katilingban. (PGO-SDN Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.