Programa ni Gov. Ace Barbers sa mga Kabantan-onan gidayeg sa gipahigayon nga Mountain Bike Challenge: “Bike for Peace”

Sa dakong tinguha sa batan-ong Gobernador Ace Barbers alang sa kalamboan sa mga kabatan-onan, ubay-ubay ang nakadayeg ug misalmot sa gipahigayon nga Mountain Bike Challenge: “Bike for Peace” atol sa selebrasyon sa ika 64 nga Anibersaryo sa Battle of Surigao Strait, diin nagsugod ang mga bikers sa may City Hall paingon sa Lipata nagtadlas sa Sabang ug Banahaw ning dakbayan.

Tungod sa kamahinungdanon sa tumong ug tinguha sa maong kalihukan, madasigon ang tanang mingsalmot niini, ug gani usa ka Swedish nasyonal nga si Krister Johnsson ang miapil aron sa pakigduyog sa mga kabatan-unang Surigaonon sa pagpahayg sa ilang tinguha sa kalinaw.

Ang mga organizer sa maong kalihokan dako ug pasalamat sa kooperasyon ug kahiusahan nga gipakita sa tanang misalmot niini diin natapos kini nga mabulukon ug malinawon.

Ang Red Mountain Cycling Club uban ang Bikers sa Surigao City nga maoy nagdumala sa maong okasyon, dako ug pasalamat sa paghatag ni Gov. Barbers ug igong pagtagad sa ilang mga paninguha nga makahatag ug dakong bili sa katilingban gikan sa sector sa mga kabatan-onan aron sa pagkab-ot sa tinuoray nga kalamboan.

Gidugang pa sa taga Red Mountain Cycling Club nga dako ang ilang gipakita nga kadasig ug panagtinambayayungay tungod kay ila usab nakita ang sinsiridad ug hugot gayud ang suporta nga gihatag kanila ni Gov. Ace Barbers.

Sa Open Category, nakuha ni Johnny Dangitio ang unang ganti nga P2,500.00, ug Levy Aceron 2nd-2,000.00, Ronnie Ecin 3rd-1,500.00 ug Edgar Napana 4th -1,000.00.

Sa Touring A Category, nakuha ni Rickson Birao ang unang ganti nga P2,500.00, ug Tirso Balbada 2nd-2,000.00, Rico Rick Antonio 3rd-1,500.00 ug Ronald Linaza 4th-1,000.00.

Sa Touring B Category, nakuha usab ni Krister Johnsson, nga mao ang giila nga usa ka Swedish National, ang unang ganti nga P2,000.00, ug Pepito Cuasim 2nd-1,500 ug Danny Woynay 3rd-1,000.00.

Adunay usab category para sa dose anyos paubos. Ug nakuha ni Aldrin Senogoya, 12 anyos nga taga Mainit, Surigao del Norte, ang unang ganti nga P1,500.00, ug Paul Joseph U. Dela Cruz, 11 anyos 2nd-P1,000.00. (PGO-Media Bureau)

Share: