Gov. Ace Barbers mihimo sa usa ka tigum aron nga mas mapalapdan ang mga programa sa Local Council for the Protection of Children dinhi sa probinsya

Ang kadumalahan sa probinsya sa pagpangulo ni Gov. Robert Ace Barbers mihimo ug usa ka mahinungdanong pulong kagahapong adlawa, Agosto 18, 2009 didto mismo sa Provincial Convention Center ning atong dakbayan, aron sa paghisgot sa mga lakang nga angay himuon aron nga mas mapalapdan pa ang mga programa nga magprotekta sa tanang kabataan dinhi sa probinsya.

Ang maong tigum nga gipahigayon sa pagpanguna sa buhatan sa Department of the Interior and Local Government, inabagan usab sa Provincial Social Welfare and Development Office ug ni Board Member Regina Alaan isip maoy Chairman on Women, Family, Gender and Development, gitambungan sa mga nagkadaiyang Local Government Unit ug Non-Government Unit sa probinsya hilabi na sa tanang Municipal Council for the Protection of Children (MCPC).

Sa maong Forum, adunay mga oryentasyon ug pagpasabot sa mga nagkalain-laing responsibilidad sa matag MCPC ang gitutukan ug gihatagan ug katin-awan. Ubay-ubay usab nga mga problema ang gipadangat sa matag MCPC nga gihatagan dayon ug direktang solusyon aron nga ila gayud mahatag ang episyente ug epektibo nga panirbisyo sa tanan kabataan.

Ug aron masiguro nga ang matag MCPC milihok ug mi kooperar gayud sa mga programa sa gobyerno, adunay Search for Most Functional Municipal Council for the Protection of Children ang gihimo sa probinsya. Sa niaging mga pagsusi nga gipahigayon sa LCPC, ang Lungsod sa Bacuag maoy nakakuha sa unang ganti ug dayon gisundan kini sa Lungsod sa Mainit isip maoy ikaduhang manana-og, ang Lungsod usab sa San Benito isip maoy 3rd prize winner ug ang 4th prize winner mao ang Lungsod sa Tubod.

Gipanghinaut ni Gov. Ace Barbers nga ang maong tigum nakahatag ug dugang kadasig sa matag MCPC nga mohimo sa ilang tagsa-tagsa ka mga responsibilidad aron nga ila gayud mahatag ang de kalidad nga serbisyo nga angay lamang sa mga nagkinahanglang kabataan. (PGO-Media Bureau)

Share: