Gov. Ace Barbers mipadayag sa pagbukas sa bag-ong Provincial Gym

Malipayon ug madasigon nga gipadayag ni Gov. Ace Barbers ang pagbukas sa dugay ng gikahinaman sa mga Surigaonon nga Prov’l. Gymnasium karong Agosto 31, 2009 atol sa selebrasyon sa Charter Day sa dakbayan sa Surigao.

Gipangandaman na karon sa probinsya ang mamahimo nga kalihukan diin kini paga-bindisyonan kini ug sundan sa usa ka opening ceremony nga paga-pangulohan ni Gov. Robert Ace Barbers ug Tourism Sec. Ace Durano, ug uban pang mga opisyales sa probinsya.

Sa nasayran, ang maong bag-ong Sports Complex, nga gisugdan sa kanhi Gobernador, Robert Lyndon Barbers ug karon gipadayon ni Gov. Ace Barbers, nakahatag ug dakong paglaum sa tanang katawhan nga pinaagi sa kumpleto ug de kalidad nga mga kahimanan niini, makapadani kini sa daghang mga investors ug mga langyaw diin makahatag gayud ug dakong kausbawan sa ekonomikanhong kalihukan sa probinsya labi na gayud sa inadlaw nga panginabuhi-an sa matag Surigaonon ug sa pagpalambo usab sa natad sa turismo.

Matud pa sa Gobernador dako ang kalipay nga iyang gibati sa dihang iyang nakita nga matuman na gayud ang dugay nga gipangandoy sa mga Surigaonon nga Sports Complex nga angay lamang gayud ipasigarbo sa tibuok nasud. Gilauman usab ni Gov. Ace Barbers ang hugot nga suporta sa tanang katawhan pinaagi na sa pag-amping ug pag-amuma sa maong Sports Complex aron kini mapuslan dili lamang karon, kun dili pati na sa umaabot pa nga mga henerasyon. Giawhag ug gihangyo usab sa kadumalahan sa probinsya ang tanang mosaksi labi na sa “free concert” niini sa pagkagabii nga himuon sa usa ka bantugan ug inila nga mang await sa nasud, nga wala gayuy dad-on nga butang aron sa pagsiguro sa seguridad, kahapsay ug kalinaw. Buot usab sa Gobernador nga mas hatagan ug prayoridad ang mga Senior Citizens ug mga kaigsuonan natong Surigaonon nga adunay deperensya sa panglawas aron nga magmalipayon gayud ang tanan sa pagsud-ong sa maong konsyerto. (PGO-Media Bureau)

Share: