Bulan sa Nutrisyon, malampusong gipahigayon sa probinsya

Nagmalampuson ang pagselebrar sa bulan sa nutrisyon diin agig pagtak-op sa maong selebrasyon mao ang paghatag ug mga premyo sa mga migula nga mananaug sa “Most Outstanding Barangay Implementation of Nutrition Program 2009” nga gihimo bag-uhay pa lamang didto mismo sa Prov’l Convention Center ning atong dakbayan.

“Mapasalamaton kami sa daku nga suporta nga gipakita ug gihatag sa atong mga lideres sa probinsya hilabi na gayud sila Gov. Robert Ace Barbers ug Bise-Gobernador Noel Catre diin ilang gihatagan ug dakong bili ang mga programa sa nutrisyon para sa katawhang Surigaonon” nagkanayon si Hon. Leonita Makinano, ang Brgy. Kapitan sa Brgy. Magallanes, Claver, Surigao del Norte.

Matud pa ni Mr. Isidrick Pacqueo sa Claver, nga ilang gipaninguha nga sa tuig 2010 ang tanang katawhan sa Claver makabaton sa kapiskay sa panglawas ug halayo sa bisag unsang sakit nga pwedeng motumaw sa ilang lungsod.

Nanghinaut usab si Mr. Antonio Tiu, ang hepe sa buhatan sa Prov’l Social Services Office (PSSO) nga ang tanan nga lumilihok sa nutrisyon kanunay nga magmadasigon sa pag pag-ambit sa mga maayong impormasyon ngadto sa ilang barangay hilabi na sa pagpalit, pagpreparar ug pag panghatag sa saktong pagkaon sa matag pamilya aron ang tanan makabaton sa saktong nutrisyon nga ilang tagkinahanglan.

Miduyog usab sa maong awarding ceremony sila Vice-Gov. Noel Catre, SP members Regina Alaan, Isabelita Edera, mga hepe ug assistants sa lain-laing departamento ingon man usab mga empleyado sa kapitolyo. (PGO-Surigao del Norte Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.