6th CARAGA Regional Human Resources Managers Convention ipahigayon sa Surigao Norte

Gikalipay ni Gov. Ace Barbers nga ang probinsya sa Surigao del Norte maoy gipili sa Civil Service Commission ug CARAGA Regional Council of Human Resource Managers’, Inc. nga maoy ilang venue sa ilang 6th CARAGA Regional Council of Human Resource Managers Convention nga magsugod karong Setyembre 16 ug matapos sa Setyembre 17, 2009 ug kini pagahimuon diha sa Provincial Convention Center, diin mihatag gayud ang batan-ong Gobernador sa iyang hugot nga suporta kabahin niini.

Ang maong kalihukan pagatambungan sa mga nagkadaiyang opisyales sa CARAGA Regional Council of Human Resource Managers’, Inc. (CRCHRMI), usa ka konseho nga nagtinambayayungay alang sa paghatag ug de kalidad ug husto nga serbisyo publiko ug gipanglantawan nga makahimo ug mga programa ug mga polisiya mahitungod sa human resource management pinaagi sa kooperasyon ug hiniusang pakigbisog sa tanang miyembro niini.

Ang ika-unom nga CARAGA Regional HRM Convention pagabuksan pinaagi sa usa ka opening ceremony diin si City Mayor Alfonso Casurra ug Gov. Robert Ace Barbers maoy mga gipasidunggang mamumulong niini. Ubay-ubay usab nga mga topiko ang ilang pagahisgutan mahitungod sa mga lakang ug mga pamaagi nga makapalambo sa panirbisyo sa matag empleyado ug ang maong mga topiko maglangkob na sa Psycho Cybernetics, Public Service Excellence, Organizational Politics ug Strengthening Human Resource Competencies.

Gipanghinaut ni Gov. Barbers nga magmalampuson ang maong dakong kalihukan nga ipahigayon dinhi sa probinsya. Iya usab nga gi-awhag ang katawhang Surigaonon nga mohatag sa ilang suporta pinaagi sa pagpakita sa mga maayong kina-iya diha sa tanang bisita nga mahidangat dinhi sa atong dapit ug sa pagminitinar sa kalimpyo ug kahapsay sa atong probinsya. (PGO- Surigao del Norte Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.