Gov. Ace Barbers mihimo na usab ug mga kalihukan nga maghatag dugang kahibalo sa mga kabatan-onang Surigaonon

Kanunay gayud nga gipanglantawan ni Gov. Ace Barbers ang kaayuhan ug kalambo-an sa tanang kabatan-onang Surigaonon, diin sugod niadtong adlaw nga Lunes, Setyembre 14, 2009, ubay-ubay nga mga kalihukan mahitungod sa paghatag dugang kahibalo ug paghatag usab sa kahigayunan sa matag tinun-an nga mahanas pa ang ilang mga talent ang gipasiugdahan sa pangagamhanang probinsyal pinaagi sa Provincial Social Sevices Office ubos na sa pagdumala sa Department Head niini nga si Mr. Antonio Tiu.

Sa ilang gipahigayon nga PopQuiz 2009, 13 ka mga tinun-an nga naggikan sa mga nagkalain-laing secondary schools sa pipila ka mga munisipyo sa probinsya ang miapil sa maong kompetisyon diin ang Lungsod sa Bacuag nga girepresentahan ni Jonathan Madelo, maoy migula nga 1st Prize Winner nga midawat sa usa ka ang coach niini nga midawat ug pahalipay gikan sa Gobernador. Samtang ang 2nd Prize nakuha sa Surigao Norte National High School pinaagi ni Longrio Platil ug ni Kimberly Claire Mosquito sa Alegria National High School para sa ikatulong ganti .

Niadtong miaging adlaw, gipadayon sa PSSO ang ilang 19th Prov’l. POPDEV Club Convention diin adunay gamay nga tigum ang ilang gihimo ug ubay-ubay ang mga topiko nga ilang gihisgutan inubanan sa mga workshops ug uban pang activities alang sa tanang mga tinun-an nga mintambong niini.

Sa mensahe sa Regional Director sa Population Commission nga si Mr. Camilo Pangan iyang gihatagan ug kabug-aton ang tema sa maong kalihukan nga “Educating the Youth to Fight Against Poverty”. Matud pa ni Mr. Pangan, gikinahanglan gayud sa mga kabatan-onan karon ang tukmang edukasyon, kay mao man kini ang tubag sa tanan kakulangon o kawad-on sa kinabuhi sa tawo. Dugang pa niini,iya usab nga gibutyag, nga ang mga ginikanan, katilingban ug ang simbahan maoy mga nag-unang instrument aron nga mahatag gayud kanila ang sakto ug tukmang kahibalo aron nga mamahimo sila nga epektibo ug episyente nga mga katawhan sa umaabot nga panahon. (PGO- Surigao del Norte Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.