13 ka Binilanggo Graduate na Pinaagi sa ALS sa DepEd

Mabulukon ug halandumon ang ika-32 nga kasumaran sa Parole and Probation Administration sa dihang midawat ug sertipiko sa paghuman sa Alternative Learning System (ALS ) ang 13 ka mga binilango sa City Jail nga gipahigayon sa Surigao City Cultural Center alas 9:00 A.M. niadtong, Hulyo 25, 2008.

Nalipayg daku si halangdong City Mayor Alfonso S. Casurra sa kalampusan sa PPA sa pagtudlo sa mga binilango sa pagsulat ug pagbasa pinaagi ni Arnel Marte, ang Mobile Teacher luyo sa kalisdanan sa pagtudlo sa mga hamtong sa basic education. Kini nakahatag dugang pagsalig sa ilang kaugalingon panahon nga sila mobalik sa atong sosyedad.

Giila ni Mayor Pons Casurra ang mga paningkamot ni Arnel Marte ang Mobile Teacher ubos sa nagpadayon nga ALS nga program ni Alice Espijon sa City Parole & Probation Office. Ang okasyon gisaksihan ni Dir. Joseph Bahian, RD-PPA 13 ug Supt. Susan A. Cuizon, sa City Div. Office.

Gawas sa regular nga sertipiko ug medalya nga nadawat sa 13 ka migraduar, mihatag usab personal si Mayor Pons Casurra sa Gold Medals gikan sa iyang buhatan alang sa 1st Honors nga si Joel Deloy, Jr., 2nd Honors nga si Antonio Cahapon hangtud sa 3rd Honors nga si Joenard Salvador labina ang pinakahamtong nga midawat sa ALS nga edukasyon nga si Maximo Billona 60 anyos ug gidugangan pa gayud ni Mayor Pons ug Cash Gift ngadto sa 13 ka mga bilanggong milampos-pagtapos sa ALS.

Kahinumduman nga sukad nahimong Mayor sa Dakbayan niadtong 1999, si Mayor Pons kanunayng nagsuporta sa programa sa Parole & Probation Office ning dakbayan, kanhi gitawag nga adult literacy hangtud nga nahimong ALS.

Sa iyang kabahin, si Supt Cuizon midasig sa mga migraduar nga magpadayon sa ilang nasugdan nga mga pagtuon aron panahon nga makalabang sila sa E & E nga qualifying examination, ilhon silang High School Graduate diin makahigayon pagkuhag kurso sa kolehiyo depende sa ilang panahon.

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.