Gov. Ace Barbers gitagaan ug dakong pagtagad ang panginahanglanon sa mga kababayen-an; Skills Training malampusong gipahigayon

Subay sa pagselebrar sa Women’s Month, malampusong gipahigayon niadtong miaging adlawa ang skills training on Recycling Used Materials and Flower Arrangement didto sa Provincial Convention Center sa tanang miyembro sa Gender and Development Coordinating Committee nga pinanguluhan sa GADCC Chairperson nga si Board Member Regina G. Alaan.

Sa maong pagbansay-bansay, gi-awhag ug gitudluan ang mga kababainhan nga giila nga “ilaw ng tahanan” sa pagrecycle sa mga butang nga gituohang dili na magamit sama sa mga plastic wrappers, cut flowers ug mga coconut husk o bunot aron kini mapuslan pag-usab.

Dugang pa niini, ang tanang partisipante gitudluan usab sa mga saktong pamaagi ug proseso sa pagplastar sa mga bulak o ang gitawag nga “flower arrangement,” nga pwede mamahimong panginabuhi-an sa uban, hilabi na sa kalisod sa panahon karon nga ang tanang panaliton sama sa mga bulak nagkamahal na.

Daghan ang nalipay ug nakadayeg kang Gov. Robert Ace Barbers sa paghatag ug dakong suporta sa maong kalihokan, hilabi na gayud nga dako ang nahatag nga tabang niini kanila. Ila gayung nakita ang tiunay nga panirbisyo ni Governor Barbers hilabi na sa paghatag niya ug dakong bili ug pagpakabana alang sa kalamboan sa tanan hilabi na sa mga kakabayen-an, pinaagi sa pagpahigayon sa maong mapuslanong kalihukan. Ubay-ubay ang mga nakat-unan ug nakutlo sa mga partisipante sa maong pagbansay-bansay, ug ang maong mga dugang kahibalo ila gayud magamit sa ila tagsa-tagsa ka mga panimalay ug panginabuhian. (PGO-Media Bureau)

Share: