Gov. Ace Barbers dako ang pagpakabana sa nagpadayon karon nga kalisod sa paghanap ug trabaho; Special Recruitment Authority sa PMTC gipahigayon

Ubay-ubay nga mga jobseekers ang mapasalamaton sa kasamtangang administrasyon sa probinsya ubos na sa pagpangalagad ni Gov. Ace Barbers sa mga paningkamot niini nga mahatagan ug trabaho ang uban natong mga kaigsuonang Surigaonon nga sa dugay na walay bisag gamay nga pangita diin ang Provincial Manpower Training Center mipahigayon sa ilang Special Recruitment Authority niadtong adlaw nga huwebes, Pebrero 19, ug 20, 2009 didto na sa ilang buhatan sa Kapitolyo.

Sa maong kalihukan, nakita sa buhatan sa PMTC nga pinanguluhan sa PESO Manager niini nga si Mr. Amor Morales ang nagpadayon karon nga kalisod sa paghanap ug trabaho tungod daghan sa atong mga kaigsuonan ang interesado niini diin mikabat sa halos 159 ka mga aplikante ang malaumon ug madasigon na miadto sa Kapitolyo sa panghinaut nga sila makapasar ug mapili para sa mga available job order.

Sa 159 ka mga aplikante adunay 49 nga mga aplikante ang migawas nga kwalipikado sa mga posisyon sa mga gikinahanglang Nurses para sa USA, Auto Electrician, Bartender, Cashier, Waiter/Waitress, Mason/Carpenter, Tile Fitter/Sitter, Accountants Computer Programmer, Welding Technician, Pipe Fitter, Welders, Diesel Engine Mechanic, Kusinero, Cleaner ug uban pa.

Malaumon si Gob. Ace Barbers nga ang maong kalihukan nakahatag ug dakong tabang sa mga katawhan hilabi na karong panahona nga kita nahiagum sa dakong epekto sa krisis nga dili lamang mitumaw sa atong katilingban kung dili pati na sa tibuok kalibutan. Dako ang kalipay ug kadasig ang nasinati sa maong mga suwerteng napili tungod ilang nakita nga ang maalagarong gobernador nagtuman gayud sa iyang mga saad ug pinaagi niini, ilang namatud-an nga ang iyang serbisyo tiunay alang sa kalambo-an sa tanan. (SdN PGO-Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.