Programa ni Gov. Ace Barbers sa maayong panglawas nagpadayon; Lungsod sa Socorro nakapahimulos sa Medical/Dental and Tuli Outreach Program sa PHO

Sa kanunayng tinguha ni Gob. Ace Barbers nga mahatagan ang tibuok katawhan sa Surigao del Norte sa ilang mga panginahanglanon tungod sa hilabihang kalisod sa panahon karon, siya hugot nga nagmando nga iyang mga programa kanunay nga magpadayon ug mapatuman sa tanan kalungsuran sa probinsya hilabi na ang mga programa sa maayong panglawas.

Ang buhatan sa Provincial Health Office uban sa pakigtambayayong sa uban pang mga departamento sa Kapitolyo mituyo ug bisita sa Lungsod sa Socorro aron sa paghatag sa ilang medical, dental ug libreng tuli alang sa tanan agig pagselebrar sa Adlaw nan Socorro niadtong adlaw nga Biyernes, Pebrero 20, 2009.

Sa maong kalihukan, adunay halos 781 ka pasyente ang ilang giatiman ug gitambalan diin mikabat sa 224 ka pasyente ang nagpaibot sa ilang mga ngipon, 27 ka tawo ang nagpa dental consultation, 124 ka bata ang gituli ug adunay 76 ka mga kababainhan ang nag pa papsmear.

Dugang pa niini, sa maong kalihukan, ang PHO uban sa pakig-hiusa sa mga empleado sa Caraga Regional Hospital Blood Bank mipahigayon usab sa ilang bloodletting activity diin adunay 44 nga mag residente sa Socorro ang boluntaryong mi donate sa ilang dugo.

Gikalipay pag-ayo sa mga residente sa Lungsod sa Socorro ang kinasingkasing nga pagbisita sa medical practitioners pinaagi na sa atong Provincial Health Officer, Dr. Audie Relliquete aron sa pagpanghatag og mga libreng tambal kanila. Dako gayod ang ilang pasalamat sa atong maalagarong gobernador, Robert Ace Barbers tungod sa kayo ug kabuotan niini nga way laing gihuna-huna kung dili ang kaayuhan sa tibuok katawhan.(SdN PGO-Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.