EDITORYAL - Unsa gyuy kahimtang sa lawas ni Ecleo?

Daghan kaayong nahibulong nganong nagpabiling maayo og lawas si Supreme cult leader Ruben Ecleo Jr. nga unta gi-diagnose naman siya nga sama sa usa ka taliulbong bomba niadtong 2004.

Ang maong teminolohiya nga sama sa usa ka “time bomb” si Ecleo, usa ka indirektang pagpasabot nga siya anaa sa usa ka talandugong kahimtang nga mahimong sa kalit atakihon sa sakit sa kasingkasing nga mahimong ikaalaot sa iyang kinabuhi.

Gani ang uban nagtuo nga malagmit gimilagrohan si Ecleo sa iyang relihiyon nga maoy nakasalbar sa iyang kinabuhi ug hangtod karon nahimo siyang usa na ka normal og panglawas nga makasugakod na sa bisyo nga labing makadaot sa sakit sa kasingkasing sama sa pagpanigarilyo, sobra nga paghago sa lawas ug uban pang trabaho nga makahagit sa pagpaluya kaniya.

Midaog siya sa pagka-kongresista , usa ka matang sa karera nga dili makab-ot sa usa ka tawong dili moagi og paghago sa lawas aron masiguro ang kadaugan, unya giingong nagpadayon pa sa iyang pagpanigariylo, usa ka matang sa bisyo nga angay likayan sa usa ka masakiton og kasingkasing.

Apan dihang gisusi sa mga imbistigador kun angay na bang ibalik siya sa prisohan kay maayo naman ang lawas, dali kaayong midepensa ang iyang doktor nga kuno operahanan pa si Ecleo sa sakit sa kasingkasing ug sama pa gihapon kini sa usa ka time bomb busa dili makaayo kaniya kun ibutang siya sa prisohan.

Karong kongresista na siya labing mihupas ang pagtuo sa kadaghanan ug labaw sa tanan sa mga kabanay sa iyang asawa nga mapriso pa si Ecleo pag-usab.

Unya kun tinuod nga siyang maoperahan, inigkaayo niya ug mahibalik na sa maayong panglawas, unsa naman usab kaha ang himoong mga katarungan ug pasangil aron nga dili gihapon siya mapriso.

Gawas sa iyang doktor karon nga nag-diagnose nga masakiton lang gihapon siya og kasingkasing wala na bay laing doktor nga angayan pang mosusi sa tinuoray nga kahimtang sa iyang lawas?

Kini maong mga pangutana usa lamang ka pagsukod kun ang kuko sa hustisya sa nasud angay bang molihok batok sa mga adunahan ug inilang tawo sama kang Ecleo. (BANAT Tabloid/Philstar.com)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.