Programa sa kapitolyo para sa mga Senior Citizen gilusad

Gilusad niadtong Febrero 17, 2011 ang “Oplan Pustiso Tabang sa Masa para sa mga Senior Citizens” didto sa Placer, Surigao del Norte.

Tungod kay ang Senior Citizen mao ang usa sa prayoridad sa HEALS nga programa nga mao ang pag–amuma sa atong mga Senior Citizen.

Gipamulong ni Gobernador Sol Matugas atol sa maong okasyon nga adunay 1% sa kinatibuk-ang budget sa probinsya ang gigahin alang sa mga programa para sa mga Senior Citizen. Si Gobernador Matugas nag-awhag usab sa tanang mayor sa munisipyo nga mogahin usab ug 1% sa ilang budget alang sa maong programa.

Ilusad usab ang programa sa maayong panglawas sa mga Senior Citizen ug kabahin na niini ang pag butang ug lamesa para sa usa ka adlaw nga medical check-up matag semana ug ang paghatag sa mga CARD alang kanila, dugang pa sa Gobernador.

Sa gipasiugdang programa nga Oplan Pustiso Tabang sa Masa alang sa mga Senior Citizen, ang Munisipyo sa Bacuag adunay 20 ka mga senior citizen ang nakapahimulos niini ubos sa pagpangulo sa ilang mayor nga si Sheila Mae O. Cebedo; Munisipyo sa Claver adunay 8, Munisipyo sa Taganaan 14; Munisipyo sa Alegria 9; Munisipyo sa Gigaquit 13; Munisipyo sa Del Carmen 29 ug sa Surigao City adunay 14 ka mga senior citizen ang nakapahimulos niini.

Ang sunod nga pag lusad sa maong programa pagahimoon didto sa Siargao Island ug Bucas Grande.

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.