Duha ka adlaw nga education caravan gipahigayon sa probinsya

Nagmalampuson ang gipahigayon nga duha ka adlaw nga Education Caravan didto sa lungsod sa Claver, Gigaquit, Bacuag, Placer, Mainit, Tagana-an, ug Alegria niadtong Hunyo 28-29, 2011.

Ang maong okasyon gipangulohan ni Gobernador Sol F. Matugas, uban ni Bise Gobernador Arturo Carlos Egay Jr., mga Board Members sa Probinsya sama nila Board member Myrna Romarate, Board member Simeon Castrence, Board member Margarito Longgos, Board member Victor Borja, Board member Mamerto Galanida, Ex oficio member Ebro Joy Orquina, mga Department Heads ug pipila ka mga empleyado sa Kapitolyo, DepEd Provincial Schools Division Superintendent Fidela M. Rosas ug mga mayores ug opisyales sa nagkadaiyang munisipyo.

Ang tumong ug katuyoan sa maong Education Caravan mao ang pakighalubilo sa gobernador sa mga kabataan ug sa mga ginikanan ug paghatag usab impormasyon sa mga ginikanan nga importante gayod ang edukasyon ug kini gihatagan ug dakong importansya ug suporta sa gobernador pinaagi sa programang HEALS sa probinsya.

Sa unang adlaw sa maong caravan, gibisitahan sa Gobernador ang mga eskuylahan sa Claver Central Elementary School Ladgaron Elementary School, Gigaquit Central Elementary School, San Isidro Central Elementary nga diin gipahigayon ang ribbon cutting sa giablihang Denatl Trough sa maong eskuylahan, Bacuag Central Elementary, Campo Central Elementary School , ug pito ka mga eskuylahan sa Placer nga mao ang Panay-an Elementary School, Tagbongabog Elem. School, Amoslog Elem. School, Placer Central Elementary School, Placer West Central Elem. School, Bad-as Elementary School ug ang Sta. Cruz Elementary School.

Sa ikaduhang adlaw sa maong caravan, mibisita ang gobernador sa mga eskuylahan sa lungsod sa Tagana-an nga mao ang Tagana-an Central Elem. School, Salvacion Elem. School, Laurel Elem. School, Upper ug Lower Libas Elem. School ug ang mga eskuylahan sa lungsod sa Mainit nga Mainit Central Elem. School ug Magpayang Elem. School, ug ang Alegria Central Elementary School sa lungsod sa Alegria.

Atol usab sa maong okasyon si Gobernador Matugas ming apod-apod usab og mga Health Kit ngadto sa mga estudyante sa grade I ug preschool. Ug gipahigayon usab ang demonstrasyon sa ensakto nga paglimpyo sa ngipon ug paghugas sa kamot.

Malipayon ug mapasalamaton kaayo ang mga mayores sa tagsa-tagsa ka mga munisipyo kang Gobernador Matugas tungod sa maong programa kay mao pa kini mahitabo sa ilang lungsod nga ang gobernador nakighimamat ug makigpulong sa sa mga estudyante ug mga ginikanan.

Gikatakda ang sunod nga Education Caravan sa Isla sa Siargao karong Hunyo 7-8, 2001 usa ka adlaw human sa State of the Province Address sa gobernador. (Provincial Information Center/PIA-Surigao del Norte)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.