Turn-over sa cash assistance sa 4-H Club sa Surigao City malampuson nga gipahigayon

Malampuson nga gipahigayon ang pagturn-over sa cash assistance ngadto na sa mga miyembro sa 4-H Club o Head, Heart, Hand, and Health Club nga gikan sa Brgy. Orok ug Brgy. Poctoy ning syudad niadtong miaging adlaw, Hulyo 14, 2011.

Ang maong cash assistance gidawat pinaagi na sa ilang Club President nga si Romel Puntavedra sa Brgy. Orok ug Romnick Cavite sa Brgy. Poctoy. Ang matag barangay nakadawat sa cash assistance nga kantidad P50,000 ka pesos.

Atol sa maong kalihukan si Surigao City Mayor Ernesto T. Matugas mipadayag sa iyang pagpasalamat sa Agricultural Training Institute sa Caraga tungod sa oportunidad nga gihatag niini ngadto sa mga kabatan-onan nga nagagikan sa nagkalain-laing barangay sa dakbayan nga mahimong miyembro niining maong club.

Dugang pa niya, siya miingon nga kinahanglan magtinabangay ang tanan alang sa pagpalambo sa syudad tungod kay ang mga kabatan-onan maoy usa sa mga bahandi sa syudad busa angayan lamang nga hatagan sila ug igong suporta ug panahon.

Ang maong kalihokan gipangulohan ni Mr. Isaiias Elumba ang hepe sa city agriculture office sa syudad uban usab ang mga miyembro sa Agricultural Training Institute (ATI) nga sila ni Levi Bayona, Marie Jocelyn Santiago, Nenita Sumile ug Jocelyn Bayona. (Annette Villaces/City Information Office/PIA-Surigao del Norte)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.