Wala lamang damha sa kanhi kongresista sa distrito II ug karong amahan sa lalawigan sa Surigao del Norte nga mao si Robert Ace Barbers nga malakip siya sa "Power 100" kun usa ka gatos nga mga pinoy kinsa adunay dakong gahom ug impluwensya sa natad sa politika ug pagtigayon sa nasod.Ang maong taho migawas pinaagi sa makuti nga pagtuki sa usa ka magazine nga mao ang The BizNews Asia.
Gikataho sa maong magazine ang ika-73 nga luna sa maong han-ay (line-up) mao si Robert Ace Barbers.
Ang maong isyu gipagawas niadtong Hunyo sa nakalabay nga tuig. Matod sa maong mantalaan nga usa sa ilang basihan mao kun gi-unsa sa mga nangatundanan ug mga magpapatigayon pag kontrolar sa ekonomiya ug sistema sa politika sa nasod.
Gilakip usab sa ilang punto kun giunsa nila paggamit ang ilang gahom ug impluwensya para sa kaayohan sa tanan katawhang Pilipino ug dili lamang ang kaugalingon interes sa ilang mga patigayon maoy gipatiugbabaw.
Gisulti sa gobernador sa lalawigan sa Surigao del Norte nga dili angay niya ipasiatab ang maong pasidungog.
Gihagit hinuon karon sa gobernador ang kabatan-onan nga dapat mopakita og maayong binuhatan sa ilang tagsa-tagsa ka mga gimbuhaton aron mas molambo pa ang nasod nga nagumon karon sa daghan suliran.(Super Banat)
