Gob. Barbers motapos sa mga proyektong nasugdan bisan kulang pundo ang lalawigan

Naninguha ang gobernador sa lalawigan sa Surigao del Norte nga taposon ang mga proyekto nga iyang nasugdan sa kanhi kongresista pa siya.

Mao kini ang gibutyag ni Surigao del Norte Governor Robert Ace Barbers niadtong nakalabay nga semana human mipatawag siya og tigum sa mga tigbalita didto sa iyang buhatan.

Matod sa gobernador nga naggahin karon ang probinsiya og dugang pondo aron pagtapos sa mga nasugdang proyekto sama sa mga kalsada, covered courts, multi-purpose ug uban pa.

Giklaro sa gobernador nga adunay 20 porsento pundo karon sa lalawigan gikan sa Community Development Fund (CDF) nga igahin aron paghuman sa mga gikahisgotang proyekto.

"Jaon (kana) mga projects nga atong nasugdan, waya (wala) laman jaon mahuman tungod kay natapos man akong termino pagka congressman, natural dili gyod naku matapos ang akong nasugdan," saysay ni Barbers.

Mipahibalo usab ang gobernador nga aduna pay mga supplemental budget sa lalawigan sulod karon nga tuig nga naghambin kun nag-ong-ong karon sa Sangguniang Panlalawigan.

"Pagma-approve jaon (kana) so pwede nasad nato maidogang ngadto sa mga proyekto sa lalawigan ug syudad sa Surigao," matod ni Barbers.

Nag-allocate pa sad ta og dugang na pundo aron mas daghan mga programa para sa katawhan sakop sa probinsiya ang makabenipisyo niini.

Mipahayag usab si Governor Barbers nga dili igo ang pundo sa lalawigan aron mahuman ang mga proyekto.

"Kulang gajud kay dili man natu mahuman tanan ang atong mga nasugdan nga mga proyekto. Phase by phase man kining tanan," matod ni Barbers.

Gipasabot sa gobernador nga dili tanan matapos ang mga proyekto sulod karon nga tuig apan iyang gipasalig nga matapos kining tanan sulod sa tulo ka tuig sa iyang termino.

"Dili man naku kini mahuman karon nga tuig apan akong ikapasalig sa mga katawhan nga matapos kining tanan by 2010. In that time, makasugod na sab ta og lain mga proyekto nga gihangyo sa mga kapitan sa intero barangay sa lalawigan," subli sa gobernador. (Roel Catoto/Super Banat Balita)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.