Gob. Ace Barbers naghatag ug tabang sa mga mag uuma

Dako ang kalipay sa mga mag-uuma sa tibuok probinsya sa ubay-ubay nga tabang ug benepisyo nga ilang nadawat gikan sa buotang gobernador Robert Ace Barbers uban sa pagdumala sa Provincial Agriculture Office.

Sa milabayng duha ka semana, kung ato madumduman, malampusong gilusad ang pang apud-apud ug halos 500 ka kahon nga seaweed liquid fertilizers nga ginganlag Freegrow sa mga nagkadaiyang mga munisipyo sa probinsya pinaagi na sa mga municipal agriculturist ug mga technicians niini. Sa 20 ka munisipyo, adunay gigahin nga 100 ka galon sa kada usa kanila diin ang ratio niini, 1 ka gallon sa 1 ka ektarya nga pananom. Ang maong pang apud apud ubos sa Fertilizer Assistance Program ni Gob. Ace Barbers, dako ug tabang para sa mga mag uuma.

Sa laing bahin usab gihimo sa Provincial Agriculture Office ang ubay-ubay nga pang apud-apod ug mga rehab palay seeds diha sa pipila ka mag uuma nga apektado sa nangagubang ektarya sa palay tungod sa makusog ug walay hunong nga ulan. Ang mga gipang hatag nga palay seeds nga mao ang RC 18 ug RC 128 “varieties”, halos mokabat sa 200 ka sako.

Dugang pa, nagmapasalamaton usab ang mga mag-uuma sa lalawigan kang Gob. Ace Barbers sa dako kaayo ug tabang niini sa nagpadayon nga pang apud-apud ug mga materyales nga kinahanglanon para sa palay check program nga gilusad sa kada munisipyo diin kadtong Enero 29, 2009 gipahigayon ang maong pag panghatag didto sa mga mag uuma sa Socorro. Ang maong programa, usa ka pamaagi aron sa pag edukar sa atong mga mag-uuma sa sakto ug tukma nga mga proseso sa pag amuma sa ilang mga palay ug uban pang pananom.

Dako ang kalipay ni Gob. Ace Barbers sa dihang iyang nakita ug nasinati ang kalipay nga gipakita sa mga mag uuma sa dihang ilang nadawat ang maong mga tabang para sa kalamboan sa ilang panginabuhi. Siya malaumon nga ang maong tabang maghatag ug dugang kadasig kanila sa pagpadayon sa pagpalambo sa agrikultura ug pagpausbaw sa produksiyon sa palay sa probinsya.(PGO-Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.