Libreng medical check-up sa mga empleyado sa kapitolyo ipahigayon

Ang buhatan sa probinsya ubos sa administrasyon ni Gobernador Sol F. Matugas, mopahigayon ug libreng Panambal o medical check-up sa tanang empleyado sa kapitolyo aron mahatagan ug pag-atiman ang maayong panglawas sa mga empleyado.

Tungod kay mao kini ang usa sa pinaka bug-at ug daku nga gitutukan sa administrasyong Matugas kabahin na sa HEALS program niini.

Si Gobernador Sol F. Matugas nagbutyag nga iya karong gipanghingusgan ang pag pahaum sa programang paugnat sa kusog o ang gitawag nga “Fitness and Wellness Program” sa probinsya aron matubag ang sakto nga panglawas sa mga empleyado ug sa ingon nga mas mapalambo pa ang sakto nga pagserbisyo sa katawhang surigaonon. Ang pagpanambal sa mga empleyado sa kapitolyo mamahimong libre ug walay bayad sa mga balayranan sa pagpanambal sulod sa usa ka tuig.

Ang maong programa gibutyag sa gobernador atol sa selebrasyon sa Valentine’s Day, kagahapong adlawa, gipahayag sa gobernador ang sakto nga pag-amuma sa atong mga kasingkasing aron malugwayan pa ang atong kinabuhi. Apan kung dili nato kini atimanon, mao kini ang hinungdan sa pag-undang sa atong kinabuhi matud pa sa gobernador.

Ang pagpalihok sa maong programa pagapanguluhan sa Provincial Sports Council ubos sa pag pangulo ni Bise –Gobernador Arturo Carlos Egay, Jr. ug kini ipahigayon sa matag semana.

Namahayag si Gobernador Matugas nga mabalik ang pag paugnat sa kusog sa mga empleyado sa kapitolyo isip legasiya sa iyang uyoan nga si kanhi Gobernador Jose Sering. (Surigao del Norte Provincial Information Center)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.