Pagsiguro sa kaayuhan sa mga OFWs tumong sa pagbisita ni Aquino sa Singapore sumala sa Malakanyang

Si Presidente Benigno Aquino III naniguro gayud nga ang kaayuhan sa mga Pilipino nga nagtrabaho sa Singapore maoy sentro sa iyang pagbisita karon nga semana didto.

Ang Presidente mubiya karong Martes alang sa lima ka adlaw nga pagbisita sa estado ngadto sa nasod sa Indonesia ug Singapore.

Sa usa ka interbyu sa sibyaanan sa dzRB niadtong Dominggo, si Presidential Communications Development and Strategic Planning Office secretary Ricky Carandang miingon nga ang Presidente muuna gayud sa pagpakisayod sa kondisyon sa mga trabahante nga mga Pilipino didto sa Singapore kaysa sa Indonesa tungod kay daghan man kanila ang nagtrabaho didto.

Gamay lang nga mga Pilipino ang nagtrabaho karon sa Indonesia ug kasagaran sa kanila mga nagadumala ug mga high ranking nga mga propesyonal ug mas maayo ang ilang kahimtang didto, segun pa ni Carandang.

“Gikinahanglan gayud ang pagpokus sa mga nagtrabaho karon sa Singapore tungod sa kadaghan nga mga trabahante didto ug ikaduha nagkinahanglan usab sila ug dugang nga pagtabang tungod kay kasagaran kanila usa lamang ka mga trabahante sa panimalay (domestic workers). So, ang isyu bahin kining pagsiguro sa kaayuhan sa mga OFWs mas nakasentro gayud sa Singapore kaysa Indonesia,” si Carandang namahayag.

Sigun pa sa Department of Foreign Affairs nga ang biyahe sa presidente nagatumong sa pagpalig-on sa pakigdugtong sa mga silingang nasod sa Pilipinas. Ang pagbisita usab sa presidente nagasunod sa tradisyun sa mga bag-o nga namuno sa nasod sa paghatag ug respeto sa mga lideres sa kaubang nasod nga miyembro sa ASEAN.

Human sa Indonesia, ang Presidente muderetso dayon pag-adto sa Singapore karong Marso 9 diin mupahigayon usab siya ug usa ka briefing didto sa Changi Reclamation Plant, Resorts World Setosa, Singapore Technologies Kinetics ug sa Changi International Airport. Ang Presidente mubiya dayon paingon sa Manila karong Marso 11.

Ang gobyerno sa Singapore mupresentar usab kang Presidente Aquino ug usa ka kadungganan diin gipangalan pa gyud kaniya ang usa ka breed sa bulak nga orchid, usa kini ka kortesiya nga gihatag lamang sa usa ka lider sa usa ka nasod.

Si Presidente Aquino makigkita gilayon sa mga Pilipino didto sa Singapore ug makighimamamat usab sa mga negosyanteng taipan ug mga kapunungan aron pag-aghat ug dugang nga mga mamuhunan sa nasod. (FEAbkilan, PIA-Surigao Norte)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.