Gov. Ace Barbers mihatag ug dakong suporta sa tanang training programs nga gipahigayon sa TESDA

Sento baytsingko (125) ka mga bag-ong Pangulong Gloria Scholars (PGS) ang mipailawom na usab sa laing han-ay sa mga training programs nga gipahigayon diha sa buhatan sa TESDA nga diin gihatagan na usab ug dakong suporta ni Gov. Robert Ace Barbers.

Ang maong training programs nga naglangkob na sa mga kuwalipikasyon sama sa Automotive Servicing, Welding, Refrigeration and Airconditioning Servicing, Building Wiring Installation ug Consumers Electronic Servicing gibuksan niadtong Hunyo 8, 2009 didto sa Prov’l Manpower and Training Center pinaagi sa usa ka Training Induction Program, diin si Gov. Ace Barbers mihatag sa usa ka mainitnon nga mensahe.

Ang Pangulong Gloria Scholarship Grant nakahatag gayud ug dakong tabang sa mga Surigaonon hilabi na nga kini mohatag sa libreng pagbansay-bansay sulod sa 38 ka adlaw nga aduna usab allowance nga P60 matag adlaw sa tanang mga tinun-an niini.

Sa mensahe sa Gobernador, iyang giluwatan nga siya malipayon nga adunay mga mapahismulanong programa nga nakahatag gayud ug dakong kausbawan sa panginabuhi-an sa matag Surigaonon sama niining Pangulong Gloria Scholarship Grant. Dugang pa niini, iya usab nga gi-awhag ang tanang mga scholars nga sila magmadasigon unta nga motapos sa ilang tagsa-tagsa ka mga qualifications aron nga sila mamahimong episyente ug epektibong lumulupyo sa katilingban. (PGO-Surigao del Norte Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.