Gov. Ace Barbers mihatag ug usbaw sa honorarium sa mga Barangay Health Workers (BHWs)

Puno sa kasadya ang mga BHWs sa dihang nadawat nila diha-diha dayun gikan kang Gov. Ace Barbers ang ilang gihandum nga usbaw sa ilang honorarium. Atol sa People’s Day sa San Francisco nga nagpadayon nga kalihukan ni G0v. Ace Barbers sa nagkalain-laing mga kalungsuran, gibutyag sa Gobernador nga pagadawaton na sa mga Barangay Health Workers ang ilang honorarium nga mokabat sa Php 250.00 gikan sa Php 200.00 matag bulan.

Gipaningkamutan gayud ni Gov. Ace Barbers uban sa Junta Probinsyal nga gipanguluhan ni Bise-Gobernador Noel P. Catre nga makahatag ug usbaw sa mga BHWs bisan pa sa kalimitado sa pondo sa probinsya, tungod kay na kita usab sa batan-ong Gobernador ang mga panginahanglanon sa mga Barangay Health Workers nga mao gayu’y direktang moatiman sa mga katawhan sa ilang tagsa-tagsa ka mga barangay kalabut na sa ilang maayong panglawas.

Sa laing bahin, gipangitaan usab ni Gov. Ace barbers ug paagi nga iya usab mahatagan ug usbaw ang tanang Barangay Nutrition Scholars (BNS) sa tibuok probinsya, kay susama sa mga BHWs, dako usab ang nahimo nga tabang sa mga BNS sa paghatag ug kalidad nga panirbisyo, labi na ang pagsiguro sa kahimsog sa mga lumulopyo labi na ang mga kabataan sa matag barangay.

Uban sa hiniusang paningkamot ni Gov. Ace Barbers, Vice- Gov. Noel P. Catre ug mga miyembro sa Sangguniang Panlalawigan, napanglantawan ni Gov. Ace nga mahatag gayud sa mga BNS ang iyang dakong tinguha nga mausbawan usab ang ilang honorarium. Dako ang pasalamat ni Gov. Ace Barbers sa nagmakanunayon nga pagdala sa mga BHWs ug BNS sa mga nagkadaiyang programa ug serbisyo sa mga kabarangayan ubos sa iyang pamunuan. (PGO- Surigao del Norte Media Bureau)

Surigao Today

All articles/photos on this website are for general information only. Surigaotoday.com does not own any responsibility for the correctness or authenticity of the information in the articles. We take no responsibility for loss, inconvenience or injury resulting from this information.